الثلاثاء ، 24تشرين1/أكتوير ، 2017

--

  1. اخر التحديثات
  2. الاكثر قراءة

ارشيف الكاتب

بدي احكــــــــــــــــــــــــي

 

 

 


=
زياد البطاينه
بقولوا الحال عال العال وماعاد يقدر حد يوجه بعد اليوم سؤال للحكومه ولا لغيرها  وانه ماعاد نسمع صوت الشحادين اللي كانوا يصرخو المجانين من سنين ماعاد نشوفهم بالشوارع  والاهم ماعدنا  نسمع ولا نشوف الشحادين  على الاشارات والميادين ومن ومن وراهم صا ر... اسمنا احنا  كلنا شحادين
شحادين و نشالين... محتالين جوعانين عطشانين يقولوا اللي بقولوه والحقيقة تتلخص بسطرين ... نحن شوية مساكين مظلومين صابرين عاجزين حتى عن فتح ثمامنا عاجزين يا بلدنا وحياتك مظلومين والصندوق بقول  زيدوا والضرائب زيدووالمخالفات زيدوا والرسوم زيدوا خلي هالشعب يشحد ليش احنا احسن من الصومال  
عطشانين يا بلدنا وبعد رفع الفاتورة ... تنك المي صار نادر وبخمس و عشرين لانه المي شحيحة لناس وناس اشس بفجرها بطلقه واشي بملى  البركه وبسبح واشي بغسل سيارته واشي بتطلع بحسرة ..... جوعانين يا بلدنا ومافي لا رز ولاطحين كلها سوس وديدان حتى الساندويش صار ملغم  والمواد  مخزونه من ايام سيدنا نوح واجا دورها اليوم ابلعوا ... بتستاهلوا ياولاد ال....بالحسرة صدورنا مليانين ومحتارين ليش نشكي محتارين لمين نشكي محتارين شو نحكي وكيف نبكي مش عارفين
في الاخبار اعداد كبيرة من تجارنا قاموا بتخزين كميات كبيرة من المواد الاستهلاكية قال جاي شهر الخير والبركه شهر رمضان والكل ببلع  شو ماكان فرصه وطلعت  فرق السعروالناس صارت تلعن هالعمر وصار صاحب البيت يحسب الخشه على المستاجر قصر.. وراح السريروانباعت السجادة  وانفرش البيت  بالحصير وصار الناس يغلقوا ابوابهم من العصر
وظت حكومتنا تهدد بجرة الغاز وجلن الكاز وارتفع سعر الكهرباولحقتها المي والكل بقول الله حي الله حي
وجهابذة الاقتصاد ا والحافظ الله عجزوا عن ترتيب الاولويات ومضطرين نتيجه لتخبط القرارات وفساد السياسات الاقتصادية والاجتماعية ا لتجار ترفع الاسعار دون شورة حد لامحاسب ولا سائل ...ماهو الشعب متعود عالرفع وحفنه من تجارنا بستغلوا الظرف وبشغلو الضمير الفاسد وقت العازة
أراضيناصارت ان ظل منها اشي للبيع كلانا للبيع قلوبنا للبيع حتى ضمايرنا صارت للبيع احنا أهل المروة صرنا للبيع وصرنا نستحي حالنا بعد ماشلحونا باسم الضرايب والرسوم مالنا ماكلفو خاطرهم يوم يسالونا ليش الحاله صارت هيك ماسالونا ليش منسرق وليش بنبيع وليش بنموت واقفين وليش وليش .. ما سألونا .
سرقونا الحيتان والقرش ... باعونا وصنعوا منا حرامية صغار بس قاعدين وحياتكو بنكبر وبنكبر ويمكن نصيرمثلهم واكثر نصير كبارواللي كان يسرق رغيف راح يصير يسرق صريف و بفن النصب يصير حريف جوعانين ومساكين .. صغار .. صغار والله بعدنا صغار وقالوا الصغير اسنانه لبن مابتنهش بعد .بس راح تقسى مع الزمن وتنهش مثل غيرها وماحد احسن من حد .
وقالو ايام الزيت اصبحت مسيت مافي يوم كامل اليوم قالوا انه عاد النفط من جديد يرتفع وينخفض سعره مثل الذهب ينزل واليورو والدولار طالع نازل حتى علبه السردين صارت تالفه وطالعه نازله بطل حد يشتري والدجاج طارسعره واللحوم بستنوا ضحايا الحج والعدس باللوج وبعدجارنا بقول بحته ومجدرة وجعده واذان الشايب وكبة مهبله واقراص
والفقير صاراليوم يشوف المي بالقناني والمواد الغذائية والفواكه والحلويات والسكر والشاي والسردين والرز والحليب صار  كل شي مجفف والبترينه والمؤسسة اللي انشت لخدمة الغلابى بسعر دكان ابو العبدوغسان وابو قاسم رغم اللعب بالنوع و بالاوزان وسوق الخضرا ماعاد مثل زمان ازمة والواحد مش ملاقي يحط رجله بروح يتفرج عالخضرة والفواكه بتخرب بمحلها وماحد شايلها واللحمة كل يوم بسعر والناس بشتروا بالدين لايهم مرض ولا سل ولا انفلونزا خنازيرولاطيور والله الوكيل مش جاسرة تفوت علينا خايفه من هالحال وبتقول محال والعيشه صارت مرة والحنظل والدفله والحرمل صار طعمها احلى
وا شي صار عبد للمال وصرنا ناس مابتنحسد عاالحال
اولادنا اللي رجعوا بعد غياب بشهادات وامال واحلام وتحولو لصفوف البطالة وصاروا بوقفوا بالطوابير على باب ديوان الخدمة وبالاخير( كش بره ودبر راسك ) واللي ماله واسطه الله مع دواليبه... وصار الواحد منا عصبيته فوق فوق لابتحمل ابنه ولاجاره ولاصديقه والواحد منا صار لما بعتذر لشخص بالطريق بتصير خروق ...ولا ارنب ولما بتحاول تاخد حقك فانت واحد مشراني ولما ما بعرف لوين رح اوصل لبكرا لوين وعيني مو نايمة ولا قلبي لما بتروح المحبة ، الاحساس
ياوطن....... معقول جهنم اللي رايحين لها اولادنا بتكون احن عليهممن صدر وطنهم ...معقول  صرنا ببلدنا غرباء وصار الضيف يقول عنا شحادين.... وصرنا نستاجر السكن ونشتري خبز من الفرن وماعاد عندنا قمح ولاطحين وولادنا صارو الصبح يشتهو رغيف ساخن وكاس حليب طازه وحبة زيتون .....والببور ماعاد فيه كاز حتى صوته يغطي على هوشاتنا وصراخنا ولما نطفيه نتشاهد وبنقول اشهد ان لااله الا الله وبنصير نسمع همساتنا وسناه برسم النا شوارب ولحى.... ونسينا كلمة شمبراللوكس والنكاشة وكبريت ثلث نجوم ونسينا البيل اللي بضوي لنا الطرقات بالليل بعد السهرة وسراج وبنوره 4ياسين ونسينا الضحك ونسينا الجوفية وحذر بذر وكمستير ونسيت الصبايا اني اه ...اني من يجديه سافر سا سافر عالبحرية ونسيت مسيكم بالخير ياعمار العماري ...ونسينا ونسينا كثير الجوع كافر والعطش كافر والحاجة كافرة وماعاد في مونه ولافزعة ولاعونه .....ماعاد يقول لك جارك تفضل ياجار ولا الصديق وين صار لي يوم ماشفتك ومامريت عالدار ....صرنا نسمع بالعسكر والحرامية وصارت فاتورة المي والكهربا والتلفون شحده والوظيفة شحدة والاكل شحدة والعلاج شحدة وطلع النا قانون المالكين غول بتهدد الملايين وكثرت الحرامية وانتشر الظلم والجرايم والسرقات .......ليش يابلدنا ليش ياناسنا ليش صرنا نشحد ونستجدي الخبزة والوظيفة والدواء والتوصيله
و بقولوا لنا شو بدكم احسن من هالعيشة ...انتم كفرة  وجاحدين بالنعمة ....يارب وين هي النعمة اكيد قلت من لايشكر لايستاهل النعمة ...بس وحياتك ماشفناها حتى نكفر فيها وانت اعلم .......ملعونه هالعولمه وملعونه التكنولوجيا وملعون المشتري والبايع

....... وماكلفت الحكومه حالها تسالنا  ليش منسرق .. ما سألونا . ..ليش منبيع .. ما سألتونا .. راح اقول  نبيع لأنو بأعونا.. بنسرق لانهم !!سرقونا ا احنا حرامية دراويش .. صغار .. صغار .. صغار..... وبعد بدكم منا نبقىواقفين   ... ومن اولادنا تبقىمزروعه بهالوطن   ومن شناطينا تهدا على الخزاين وتحتها....... مابعرف كيف والحالة من سئ لاسوا ،
وكلها مطنشه.....ا وعامله حالها مش عارفة وانحصر ه الكل ا بالتغيير وبالتعديل والاستقبال والتوديع وتوزيع لحمة الضحية قبل تتوزع مع الوظائف على مستحقيها والمكافات على اللي طبلو زمروا..... وبكره بتيجي حكومة بتلعن اللي قبلها وبتقول...الحق على اللي  قبلي واولادنا بكونو طلعوا وصرنا عالحديدة وبدور الكرسي وبتروح الحكومة وتيجي حكومة غيرها  والهم بعده هم ..... يامنترى بنشوف يوم جديد وبنفرح احفادنا ونثبت لهم  بانا مازلنا محافظين على كرامتنا وعزتنا ورافعين راسنا

 

 

 

أضف تعليق

محامص ابو الجود محامص ابو الجود محامص ابو الجود

لا يتوفر نص بديل تلقائي.

مياه ابوالجود الصحية - عراقة الاسم تكفي

لا يتوفر نص بديل تلقائي.

جامعة عجلون الوطنية *** جامعة عجلون الوطنية **** جامعة عجلون الوطنية

جامعة وطنية خاصة تعنى بتخريج جيل متميز قادر على التطوير والتجديد والابداع والبناء

تعبئة كاسات ، مياه ومشروبات غازيه بيبسي كوكاكولا وعصائر مبرده

ربما تحتوي الصورة على: ‏‏نص‏‏